Nadalina Lyrics

Ovo van je štorija o Nadalini. More bit da vi znate Nadalinu, a !? Ahaha, sva puca od lipote ! A jema je, da van pravo rečen, ča i vidit, smantala bi ona i većega muškardina, di neće ovakoga karonju ka ča san ja, a najskoli kad pere noge u dvor. Ajme !

Kad Nadalina noge toća srid dvora u maštilu,
Jo, ke beleca, ke finoća, inšempja mlados' cilu,
Svi gledadu u noge bile uz bačve karatile,
Jer slaja je od zrilog voća, kad Nadalina noge toća,
Jer slaja je od zrilog voća, kad Nadalina noge toća.

Nadalina, Nadalina,
Da si moja, Nadalina,
Jemala bi muškardina,
Nadalina, Nadalina.

Jo, da mi je onoga slatkoga o' fešte ! Rožade, galetine, mandulati, torte, krokanti... Ni ništa slaje o' slatkoga. More bit da je samo slaja Nadalina. Cili dvor zamiriši i poludi kad ona pravi slatko. Ajme !

Kad Nadalina misi slatko u dane isprid fešte,
Jo, da je vidit bar na kratko ča skriva ispo' vešte,
Jer sla'ka je ka cukar fini, dok leti po kužini,
I rado bi je jema svatko, kad Nadalina misi slatko,
I rado bi je jema svatko, kad Nadalina misi slatko.

Nadalina, Nadalina,
Da si moja, Nadalina,
Jemala bi muškardina,
Nadalina, Nadalina.

Jaja se, to cili svit zna, moredu na milijun mali način spravjat, i u šorbulu, i na joko, sirova, more ih se: i u tvrdo, i u meko, i u gusto, i u ritko, i sa svon mogućon spizon mutit, al' kad Nadalina muti jaja, kad ih žbatije, to je prava fešta od jaj ! Ajme !

Kad Nadalina muti jaja, zamuti pamet svima,
I svakin danon sve je slaja, ka gucaj dobrog vina,
Na sebi jema sve nalige iz ćaćine butige
I svi je želu bez retaja, kad Nadalina muti jaja,
I svi je želu bez retaja, kad Nadalina muti jaja.

Nadalina, Nadalina,
Da si moja, Nadalina,
Jemala bi muškardina,
Nadalina, Nadalina.

E, vaja poć leć, finila je i ova. Al' kad Nadalina gre leć, to pari ka da cvit počiva u cviću. Ma da mi je koji put vidit kako se ono uvučije u posteju, kako ono sva miriše. Noć zasvitli, cvrčki počnu pismu. Nadalina, Nadalina !

Kad Nadalina gasi sviću kraj otvorenih škura,
Jer lito je i sve u cviću, a malo noćnih ura,
Pod ponistru tad momci stanu i napravu galamu,
Da požele jon pismon sriću, kad Nadalina gasi sviću,
Da požele jon pismon sriću, kad Nadalina gasi sviću.

Nadalina, Nadalina,
Da si moja, Nadalina,
Jemala bi muškardina,
Nadalina, Nadalina.

Nadalina, Nadalina,
Bit ćeš moja, Nadalina !